Abinda ya sa Iran ta gagara faɗuwa duk da takunkuman shekaru 47

Abinda ya sa Iran ta gagara faɗuwa duk da takunkuman shekaru 47 —Rahoto

Babban dalilin da ya sa Iran ta samu gagarumar nasara a fannin fasaha da kere-kere duk da takunkumi da faduwar darajar kuɗi shi ne manufar dogaro da kai, da kuma juya takunkumin ya zama silar gano dabarun gida.

 

Sashin nazari na The Wire ya nuna cewa tilas ta sa kasar gina dabarun kariya da bunƙasa tattalin arziƙi ba tare da dogaro da kasashen Yamma ba. 

Kasar Iran tana yaye kusan injiniyoyi 350,000 duk shekara, wanda hakan ya sanya ta zama daya daga cikin kasashen da suka fi yawan kwararru a fannin kimiyya. 

Gwamnati ta gina jami'o'i masu dumbin yawan gaske da daruruwan cibiyoyin bincike (kamar Pardis Tech Hub) wadanda ke samar da fasahohin zamani na farar hula da na soja. 

Haka kuma, saboda rashin damar amfani da shafukan Yamma kamar Amazon, Uber, ko Netflix, matasan kasar sun samar da mafita na cikin gida (kamar Digikala da Snapp) wadanda ke hidimta wa mutane miliyan 80. 

Kamar yadda rahoton The Reporter Ethiopia ya bayyana, Iran ta cimma ikon kera kashi 95 cikin dari na magungunan da take buƙata a cikin gida don kauce wa matsalar katsewar kayayyaki. 

Bayanai sun ce, sakamakon takunkumin makamai, kasar ta zama gaba-gaba wajen kera makamai da jirage marasa matuƙa wadanda ke da matuƙar hadari da inganci, a cewar International Institute for Strategic Studies. 

Iran na daya daga cikin kasashe kalilan da ke da ikon harba tauraron dan adam zuwa sararin samaniya ta hanyar amfani da kayan aikin cikin gida.

 

Kamar yadda rahoton SpecialEurasia ya nuna, gwamnati na ware miliyoyin daloli (kamar dala miliyan 115 don binciken kirkirarriyar basira ta AI, wato "Artificial Intelligence" domin bunkasa fasahar zamani. 

Akwai kusan kamfanoni 10,000 na ilimi da ke aiki a cikin wuraren shakatawa na kimiyya da fasaha guda 33 a fadin kasar. 

Kasar ta samar da hanyoyin sadarwa na boye don shigo da kayayyakin da ba ta da su, da kuma sayar da danyen mai ta hanyar kaucewa takunkumai.

Tehran tana samun hadin gwiwa da kasashe irin su China da Rasha don musayar fasaha da kuma ketare shamakin takunkumin kasashen Yamma. 

Waɗannan nasarori sun samo asali ne daga cakuduwar tsare-tsare na gwamnati, shugabanci da kuma dogaro da kai na matasa.

Gwamnati ta mayar da hankali matuka wajen saka hannun jari a fannonin ilimi, kere-kere, da kuma tsaro. 

Masana da masu nazari, sun ce ganin yadda aka killace ta, kasar ta tilasta wa kanta kera kusan komai da kanta.

—Progress Radio, Gombe